AVB KULIPA KISASI KWA CHELSEA??? NI KATIKA DABI YA LONDON JUMAMOSI. EPL YARUDI, RATIBA KAMILI.

Andre Villas-Boas, Meneja alietimuliwa kazi na Chelsea baada ya Miezi 9 tu mwanzoni mwa Mwaka huu, Jumamosi atapata nafasi safi ya kulipa kisasi wakati Timu yake anayoiongoza sasa Tottenham itakapoikaribisha Chelsea Uwanjani White Hart Lane katika Mechi ya Ligi Kuu England ambayo ni Dabi ya Jiji la London.

Msimu uliopita, Chelsea walimaliza Ligi wakiwa nafasi ya 6, nafasi mbili nyuma ya Tottenham lakini Chelsea wakaichukua nafasi ya Tottenham kucheza UEFA CHAMPIONZ LIGI kwa vile Chelsea ndio Mabingwa watetezi wa Mashindano hayo na wao Tottenham kutupwa kucheza EUROPA LIGI.

Baada ya kutimuliwa Andre Villas-Boas, mwenye Miaka 34, nafasi yake huko Chelsea ikachukuliwa na aliekuwa Msaidizi wake, Roberto Di Matteo, ambae ndie aliiongoza Chelsea kutwaa Ubingwa wa Ulaya walipoitoa Bayern Munich kwa matuta Mwezi Mei kwenye Fainali huko Munich, Germany.

Chelsea watatinga White Hart Lane wakiwa ndio vinara wa Ligi wakiwa na Pointi 19 baada ya kushinda Mechi 6 na sare 1 na Tottenham wamepanda hadi nafasi ya 5 baada ya kuchinda Mechi zao 4 za mwisho ukiwemo ule ushindi wao murua huko Old Trafford walipoifunga Manchester United bao 3-2 huo ukiwa ushindi wao wa kwanza Uwanjani hapo katika Miaka 23.

Ikiwa Tottenham watamudu kuisimamisha Chelsea hilo litatoa mwanya kwa Timu zinazoifukuza Chelsea ambazo ni Manchester United, Mabingwa Manchester City na Everton.

Man United, ambao wako nafasi ya pili na wenye Pointi 15, wapo kwao Old Trafford kucheza na Stoke City, Man City, ambao pia wana Pointi 15, wapo ugenini kucheza na WBA ambao wako nafasi ya 6, na Everton, walio nafasi ya 4, wanacheza na Timu ya mkiani Queens Park Rangers.

Wachezaji toka Mechi za Kimataifa

Klabu nyingi za Ligi Kuu England zitakuwa zikisubiri kurudi kwa Wachezaji wao kutoka kuzichezea Nchi zao huku wakiwa na wasiwasi kama wako fiti lakini Chelsea watacheza na Spurs bila ya majeruhi Frank Lampard na Ryan Bertrand.

Manchester United, ambao wana listi ndefu ya majeruhi, wanaweza kupata ahueni baada ya Ashley Young na Chris Smalling kupona na kurejea mazoezini tangu Wiki iliyopita.

Man City wataenda huko Hawthorns kucheza na WBA bila ya David Villa ambae aliumia hivi juzi akiichezea Nchi yake Spain na pia Kiungo Jack Rodwell lakini machachari wao Mario Balotelli amepona na juzi alifunga bao wakati Nchi yake Italy ilipoichapa Denmark bao 3-1.

Arsenal, ambao wameteleza hadi nafasi ya 7 wakiwa na Pointi 12, watasafiri kwenda kucheza na Norwich City ambao Msimu huu hawajashinda hata Mechi moja ya Ligi.

Arsenal watacheza bila ya Theo Walcott  alieumizwa kifua kwenye Mechi ya Nchi yake England ilipocheza na San Marino Ijumaa iliyopita lakini Straika wao Olivier Giroud anaweza kucheza baada ya kuifungia Arsenal bao lake la kwanza kwenye Ligi Arsenal ilipoicharaza West Ham 3-1 katika Mechi iliyopita na pia kufunga bao muhimu kwa Nchi yake France ilipotoka 1-1 na Mabingwa wa Dunia Spain katika Mechi ya Kombe la Dunia juzi Jumanne.

RATIBA NA MAREFA wa MECHI za WIKIENDI:

Jumamosi Oktoba 20

Tottenham Hotspur v Chelsea

Refa: M Dean

Wasaidizi: S Ledger, J Brooks

Refa wa Akiba: L Mason

Fulham v Aston Villa

Refa: C Foy

Wasaidizi: M McDonough, D C Richards

Refa wa Akiba: I Williamson

Liverpool v Reading

Refa: R East

Wasaidizi: A Garratt, R West

Refa wa Akiba: K Friend

Manchester United v Stoke City

Refa: A Taylor

Wasaidizi: D Cann, S Long

Refa wa Akiba: M Halsey

Swansea City v Wigan Athletic

Refa: M Jones

Wasaidizi: H Lennard, A Halliday

Refa wa Akiba: K A Woolmer

West Bromwich Albion v Manchester City

Refa: M Clattenburg

Wasaidizi: S Beck, S Child

Refa wa Akiba: C Pawson

West Ham United v Southampton

Refa: N Swarbrick

Wasaidizi: J Collin, L Betts

Refa wa Akiba: J Moss

Norwich City v Arsenal

Refa: L Probert

Wasaidizi: R Ganfield, D Bryan

Refa wa Akiba: A Marriner

Jumapili Oktoba 21

Sunderland v Newcastle United

Refa: M Atkinson

Wasaidizi: M Mullarkey, S Burt

Refa wa Akiba: A Taylor

Queens Park Rangers v Everton

Refa: J Moss

Wasaidizi: J Flynn, C Breakspear

Refa wa Akiba: P. Dowd