ANAYESHIKILIA REKODI YA MABAO SI MESSI, NI CHITALU: ZAMBIA FA WANENA

Kutoka SokaInBongo.com

>>WADAI CHITALU NDIE MFUNGAJI BAO NYINGI, 107 MWAKA 1972!

Chama cha Soka cha Zambia, ZFA, kimedai kuwa Straika wao Godfrey Chitalu  ndie anaeshikilia Rekodi ya kufunga Bao nyingi ndani ya Mwaka mmoja wa Kalenda na si Lionel Messi kama inavyoshabikiwa.

Wikiendi iliyopita, Messi alifunga Bao lake la 86 kwa Mwaka 2012 na kuipiku Rekodi iliyokuwa ikishikiliwa na Mjerumani Gerd Muller alipofunga Mabao 85 Mwaka 1972 lakini sasa Zambia wameibuka na kudai Rekodi hiyo ya Goli nyingi bado inashikiliwa na Godfrey Chitalu aliyoiweka Mwaka 1972 kwa kufunga Bao 107 wakati akiichezea Kabwe Warriors na Timu ya Taifa ya Zambia.

Msemaji wa ZFA amedai: “Tunayo Rekodi hii, imerekodiwa Zambia lakini, bahati mbaya, haikurekodiwa Dunia nzima!”

ZFA imesema kuwa sasa wameunda Tume huru kuihakiki Rekodi ya Chitalu kuonyesha kila Mechi aliyofunga Goli na matokeo ya Tume hiyo yatatumwa CAF na FIFA ili wadhihirishe ukweli wa madai yao.

Godfrey Chitalu alifariki Mwaka 1993 kwenye Ajali ya Ndege iliyowaua pia Wachezaji wa Timu ya Taifa ya Zambia huko Nchini Gabon.