KOMBE la DUNIA-Brazil 2014: RAIS Brazil asaini Sheria Bia kuuzwa kwenye Mechi

Rais wa Brazil Dilma Rousseff amesaini Sheria inayoruhusu Bia kuuzwa kwenye Mechi wakati wa Fainali za Kombe la Dunia zitakazochezwa Nchini humo Mwaka 2014 baada ya Muswaada wa Sheria hiyo kupitishwa Bungeni Mwezi uliopita licha ya kupingwa sana.

Tangu Mwaka jana kumekuwa na mvutano mkubwa kati ya FIFA na na baadhi ya Wabunge wa Bunge la Brazil ambao walikuwa wakichangia Muswada wa kupitisha Sheria ya Kombe la Dunia ambao moja ya vipengele vyake ni kuruhusu uuzwaji wa Bia kwenye Viwanja vitakavyochezwa mechi za Kombe la Dunia.

Tangu Mwaka 2003 uuzwaji wa Pombe kwenye Viwanja vya Soka ulipigwa marufuku ili kuzuia fujo lakini moja ya masharti ya FIFA ni kuruhusu Pombe Uwanjani kwa vile baadhi ya Wadhamini wake wakubwa, kama vile Budweiser, ni Watengenezaji Bia.

Muswada huo wa Kombe la Dunia ulikuwa upigiwe kura mwishoni mwa Mwaka jana lakini ulichelewa kutokana na mvutano wa kuruhusu Bia huku Waziri wa Afya wa Brazil, Alexandre Padilha, akiwa ndie mpinzani mkubwa wa kuruhusu kuuzwa kwa Pombe Viwanjani.

Sheria ya Kombe la Dunia iliyosainiwa na Rais Dilma Rousseff haitaji lolote kuhusu kuzuiwa uuzwaji Bia hivyo kuacha nafasi Bia kuuzwa wakati wa Mechi lakini Wachunguzi wamedai baadhi ya Majimbo ya Brazil yana Sheria zao zilizo wazi kupinga uuzwaji Bia na hivyo wanaweza kuamua kuendelea kupiga marufuku Bia.

Source: sokainbongo.com